Cemil Said · MealMerkezi.Net

1

Semâvâtda ve arzda ne var ise cümlesi Allâh’a hamd iderler. Allâh ’azîz ve hakîmdir.

C. Said 59:1

2

Ehl-i kitâb meyânından kâfirleri diyârından çıkaran odur. Bu ânların hicretlerinin başlangıcı idi. Siz ânların çıkacağına inanmıyor idiniz, ânlar da kal’aları kendilerini Allâh’a karşu muhâfaza ider zan iyliyorlar idi. Allâh ânları hiç beklemedikleri bir tarafdan hücûma dûçâr itdi, kalblerine dehşet ilkâ iyledi. Hânelerini kendi elleri ile tahrîb idiyorlar idi, mü’minlerin elleri de bu tahrîbe yardım idiyor idi. Ey basîret erbâbı ’ibret alınız!

C. Said 59:2

3

Ânların hicretlerini Allâh evvelden takdîr itmemiş ola idi ânları bu dünyâda tecziye ider idi, ateş ’azâbı ânları âhiretde bekliyor.

C. Said 59:3

4

Çünki ânlar Allâh ve rasûlüne karşu muhâlefet itdiler. Halbuki Allâh’a muhâlefet idene Allâh’ın ’azâbı şedîddir.

C. Said 59:4

5

Hurma ağaçlarından bir kısmını kesdiniz, diğer bir kısmını bırakdınız, Allâh’ın izniyle fâsıkların cezâsını virdiniz.

C. Said 59:5

6

Allâh’ın rasûlüne ihsân iylediği ganâimi ne develeriniz ile, ne atlarınız ile istihsâl iylediniz. Ancak Allâh rasûlünü kimin üzerine ister ise teslît ider, Allâh her şeye kâdirdir.

C. Said 59:6

7

Karyeler ahâlîsinin emvâlinden Allâh’ın rasûlüne ihsân iyledikleri Allâh ve rasûlünün ve rasûlün akrabâsının, yetimlerin, fukarânın ve seyyâhlarındır, zenginlerin hiç bir hakkı yokdur. Rasûl size ne virir ise kabûl idiniz ve size red itdiğinden hazr iyleyiniz, Allâh’dan korkınız, çünki ’azâbı şedîddir.

C. Said 59:7

8

(Ganâimden) bir kısmı hânelerinden koğulmuş, emvâlini gâib itmiş olan ve Allâh’ın rızasını istihsâl içün Allâh’a ve rasûlüne müzâheret iyleyen fakîr muhâcirlerindir. Bunlar sâdık olanlardır.

C. Said 59:8

9

Hânelerine sâhib olub da evvelce dîn-i islâmı kabûl itmiş olanlar kendi hânelerine ilticâ idenleri severler ve hasûd olmayub başkalarının hisselerine göz dikmezler ve hattâ kendileri de fakîr oldukları halde diğerlerini kendilerine takdîm iderler. Nefislerinden hisseti ihrâc idenler felâh bulurlar.

C. Said 59:9

10

Ânlardan sonra gelenler "Ya rabbî islâmı kabûlde bize tekaddüm idenler hakkında kalblerimize gayz ve hased ilkâ itme. Yâ rabbî sen şefkatli ve rahîmsin" dirler.

C. Said 59:10

11

Ehl-i kitâb meyânındaki kâfirlere "Sizi koğarlar ise biz de sizinle berâber çıkarız, size ta’arruz içün kimseye itâ’at itmeyiz ve size ta’arruz iderler ise biz yardım ideriz" diyen münâfıkları göriyor mısın, bunlar yalan söylüyorlar.

C. Said 59:11

12

Eğer (kâfirler) koğılur ise ânlar meskenlerinden çıkmazlar ve ânlara yardım itmezler, evvelâ yardım itmeğe kalkışsalar bile hemân kaçarlar ve ânlara hiç bir fâideleri olmaz.

C. Said 59:12

13

Münâfıkların kalblerinde sizden olan korkuları Allâh’dan olan korkularından daha fazladır çünki ânlar Allâh’ın ’azametini anlayamıyorlar.

C. Said 59:13

14

Ânlar ancak köylerinde tehassün iderek ve yâhud siperlerinin arkasında cem’ olub sizinle muhârebe idebilürler. Ânların kendi beynlerindeki ’adâveti şedîddir. Sen ânları müttehid zan idersin, hayır ânların kalbleri müteferrikdir çünki ’akılsız bir kavimdirler.

C. Said 59:14

15

Ânlar kendilerinden az evvel gelmiş olanlar gibi hareket idiyorlar lâkin ef’âl-i mezmûmelerinin fenâ meyvelerini göreceklerdir. Bir ’azâb-ı elîm ânlara muntazırdır.

C. Said 59:15

16

Ânların hareketi şeytânın hareketine benzer. Şeytân insâna "İman itme" dir ve insân kâfir oldığı vakit "Ben senin a’mâlinde müşterek değilim ben rabbu’l âlemin olan Allâh’dan korkarım" dir.

C. Said 59:16

17

Halbuki her ikisinin (Şeytân ve insânın) [1] ’âkıbeti ebedî bir ateşidir. Çünki zâlimlerin cezâsı budur.

C. Said 59:17

18

Ey mü’minler! Allâh’dan korkunuz her nefis yârın kendisine ne muntazır oldığını görsün, Allâh’dan korkunuz çünki Allâh hep yapdıklarınızdan haberdârdır.

C. Said 59:18

19

Allâh’ı ferâmûş idüb de Allâh’ın da kendilerini unutdurdığı insânlar gibi olmayınız, ânlar fâsıkdırlar.

C. Said 59:19

20

Ehl-i cehennem ile ehl-i cennet müsâvî olamaz. Ehl-i cennet bahtiyârdırlar.

C. Said 59:20

21

Eğer Kur’ân’ı bir dağ üzerine inzâl ide idik, Allâh korkusundan dağın alçaldığını ve yarıldığını görir idin. Biz bu misâlleri îrâd idiyoruz ki insânlar düşünsünler.

C. Said 59:21

22

Ol Allâh te’âlâ kendinden başka Allâh olmayan Allâh’dır. ’Âlem-i mer-î ve gayr-i mer-îyi bilür. O müşfik ve rahîmdir.

C. Said 59:22

23

Ol Allâh te’âlâ kendinden başka Allâh olmayan Allâh’dır. O bir hükümdâr-ı mübârek, rehâkâr, sâlim, muhâfız, kâdir, ’âlî ve pür-şân ve şerefdir. Şerîki olmakdan münezzehdir.

C. Said 59:23

24

Allâh te’âlâ yegâne hâlikdir her şeyi yokdan vâr itmişdir. En güzel isimler ânındır. Semâvât ve arzda her şey şânını a’lâ ider. O ’azîz ve hakîmdir.

C. Said 59:24